NEGOSYANTENG BABAE GIPUSIL PATAY SA NESORICOM VILLAGE, MAGDAUP, IPIL, ZAMBOANGA SIBUGAY

Thata Manlapaz

IPIL, ZAMBOANGA SIBUGAY - Patay ang usa ka 45 anyos nga babaye human kining gipusil sa wala mailhing mga suspetsado Miyerkules sa gabii, Pebrero 4, 2026 bandang alas-7:45 ang takna sa mismong pinuy-anan niini sa Nesoricom Village, Magdaup, Ipil, Zamboanga Sibugay.

Giila ang biktima nga usa ka Madonna Mohammad Sablani, biyuda, negosyante, tag-iya sa Marazzi, ug residente usab sa nasampit nga subdivision. Base sa nakalap nga inisyal nga impormasyon gikan sa Zamboanga Sibugay Provincial Police Office (ZSBPPO), kalit lang gipusil ang biktima sa mga wala pa mailhing indibidwal, hinungdan sa iyahang hinanaling kamatayon. Gikataho nga human sa panghitabo, dali nga niiskapot ang mga suspetsado sakay sa pula nga Honda CRF150 nga motorsiklo nga walay plate number, ug dayong misirit sa national highway paingon sa direksyon sa lungsod sa Titay.

Dayon nga giproceso sa kapulisan ang crime scene ug gipahigayon ang imbestigasyon aron matino ang motibo sa krimen ug mailhan ang mga suspetsado. Padayon usab ang hot pursuit operation ug hugot nga koordinasyon sa mga silingang police stations alang sa dali nga pagdakop sa mga responsable sa maong pagpamusil. Padayon pang ginahulat ang dugang detalye samtang nagpadayon ang imbestigasyon sa kapulisan.