ALEX EALA UG JERRY SHANG PILDI SA EXHIBITION MIXED DOUBLES SA MACAU

Thata Manlapaz

IPIL, ZAMBOANGA SIBUGAY- Pildi ang tandem nila niAlex Eala sa Pilipinas ug Jerry Shang sa China batok nila ni Alejandro Davidovich Fokina sa Spain ug Wu Yibing sa China, sa iskor nga 7-5, 7-6 (1) sa mixed doubles exhibition match.

Gikatakdang magduwa unta sila si Eala ug Shang batok nila ni Wu Yibing ug Mirra Andreeva sa Russia, apan ming-atras si Andreeva tungod sa wala hisayring rason. Tungod niini, giusab ang iskedyul ug gihimo na lang nga espesyal nga exhibition match diin duha ka mga lalaki ang kontra nila ni Eala ug Shang.

Bisan pa sa kapildihan sa mixed doubles, mag-atbangay gihapon si Alex Eala ug Mirra Andreeva sa singles match karong adlawa, Disyembre 28. Kini gitan-aw sa daghang tennis fans nga usa ka rematch sa ilahang panag-atbang niadtong 2022 US Open Girls Singles. Kahinumduman nga niadtong 2022, si Eala, nga ika-10 seed niadtong panahun diin nakadaug kini batok kang Andreeva sa quarterfinals sa iskor nga 6-4, 6-0. Human niini, mipadayon si Eala ug nakadaug sa titulo, batok kang Lucie Havlickova sa finals—usa ka dakong kalampusan alang sa Pilipinang tennis star.

Daghan na ang kausaban sukad niadtong panahuna. Sa karon, si Alex Eala naa na sa world ranking No. 53, ug niabot pa gani sa iyahang career-high nga No. 50 niadtong Nobyembre. Samtang si Mirra Andreeva mas misaka pag-ayo, kay karon world No. 9 na siya, human midaug ug duha ka singles titles ug nakaabot sa semifinals sa 2024 French Open, ug sa quarterfinals sa Wimbledon karong tuiga.

Sa laing bahin, sa men’s singles match sa wala pa ang mixed doubles, napildi si Jerry Shang batok kang Davidovich Fokina sa iskor nga 7-6 (3), 7-5. Samtang sa usa pa ka men’s singles game, nag-atbang si Humberto Eco ug Wu Yibing. Bisan exhibition match lamang, nagpadayon gihapon ang pagpakita ni Alex Eala sa iyahang determinasyon ug abilidad sa internasyonal nga entablado, ug daghan ang naghulat sa iyahang sunod nga duwa batok kang Andreeva, nga gilauman nga usa na usab ka kulba-hinam nga panagsangka sa tennis court.