IPIL CHRISTMAS CARNIVAL LIBRE PAG-USAB ANG ENTRANCE FEE KARONG DISYEMBRE 30

Thata Manlapaz

Ipil, Zamboanga Sibugay- Padayon ang malinawong ug malipayong selebrasyon sa Pasko sa Ipil ubos sa administrasyon ni Ipil Mayor Ramses Troy “Rambo” D. Olegario, diin gipahibalo sa makausa pa sa Lokal nga Panggamhanan sa Ipil nga libre ang entrance fee sa Ipil Christmas Carnival karong December 30 isip espesyal nga New Year’s treat alang sa tanang katawhan.

Tumong sa maong kalihukan nga mahatagan ug higayon ang matag pamilya, ilabi na ang kabataan, nga magkakuyog, malingaw, ug maghimo ug nindot nga handumanan samtang nagpaabot sa bag-ong tuig.

Ang libre nga carnival entrance usa ka pamaagi sa LGU Ipil aron mapalapad ang kalipay ug kalingawan, labi na human sa mga nasagubang nga mga pagsulay ug kakapoy sa tibuok tuig. Ang Ipil Christmas Carnival naglakip sa nagkalain-laing rides, dulaanan, ug kalingawan nga sigurado nga malingawan sa mga bata ug hamtong. Pinaagi niini, gipalig-on sa administrasyon ni Mayor Rambo ang mensahe nga ang Pasko dili lang bahin sa selebrasyon, kundili bahin sa paghiusa ug pag-amuma sa matag Ipileños. Usa kini ka pahinumdom nga ang Pasko ug ang pagsugat sa Bag-ong Tuig mao ang panahon sa pagpakabana sa isig-ka-tawo, pagpasalamat, ug pagpaambit sa kalipay.

Gidapit sa LGU Ipil ang tanang katawhan nga moapil ug mag-enjoy sa maong libre nga kalingawan karong December 30.