LGU-IPIL PCSA BALLGAMES 2026, PORMAL NANG GISUGDAN; SPORTSMANSHIP UG PANAGHIUSA GIPASIDUNGGAN

Thata Manlapaz

IPIL, Zamboanga Sibugay — Dili lamang kompetisyon sa sports ang gipasidunggan sa Local Government Unit (LGU) of Ipil sa opisyal nga paglunsad sa 2026 Philippine Civil Service Anniversary (PCSA) Ballgames, apan usa usab kini ka higayon aron mapalig-on ang panaghiusa, camaraderie ug maayong relasyon sa mga kawani sa lokal nga panggamhanan.

Gipahigayon ang LGU-Ipil 2026 PCSA Ballgames Launching Ceremony niadtong Biyernes, Setyembre 4, 2026, sa LDRRMO Court, isip kabahin sa selebrasyon sa 126th Philippine Civil Service Anniversary.

Gipangulohan ni Municipal Mayor Hon. Ramses Troy D. Olegario ang pormal nga pagsugod sa ballgames pinaagi sa Declaration of Opening, nga maoy nagtimaan sa opisyal nga pag-abli sa mga kompetisyon.

Apan sa wala pa kini, gisugdan ang programa pinaagi sa National Anthem ug Opening Prayer, nga gisundan sa Welcome Remarks ni SB Member Hon. Glenn Ian Y. Sabijon alang sa mga opisyal, department heads, empleyado ug personnel nga mitambong sa kalihukan.

Usa sa gipasiugdang mensahe sa maong kalihukan mao ang pagpalambo sa sportsmanship ug respeto taliwala sa mga partisipante. Gipangulohan mismo ni Mayor Olegario ang Oath of Sportsmanship, diin gipasiugda ang pagsunod sa mga lagda, pagrespeto sa mga opisyal sa duwa ug pagdawat sa resulta sa kompetisyon, daog man o pildi, uban ang dignidad ug pagkamapaubsanon.

Gipahigayon usab ang Oath of Sports Officials, nga gipangulohan ni SB Member Janelle Bordner-Andalahao. Pinaagi niini, gipasiugda ang responsibilidad sa mga sports officials sa patas nga pagpatuman sa mga lagda ug sa pagseguro nga hapsay ug organisado ang dagan sa mga kompetisyon.

Nahimo usab nga kabahin sa opening ceremony ang individual introduction sa mga partisipante, diin matag usa mipaila sa ilang kaugalingon samtang nagsul-ob sa uniform sa ilang tagsa-tagsa ka cluster.

Dugang sa ballgames, gipresentar usab ang mga opisyal nga kandidato alang sa LGU-Ipil 2026 PCSA Mr. & Ms., isip usa pa ka bahin sa mga kalihukan nga gilakip sa selebrasyon sa Civil Service Anniversary. Gipahinumduman ang tanang clusters sa LGU nga siguruhon ang presensya sa ilang mga kandidato alang sa maong presentation.

Human sa seremonyal nga mga kalihukan, gipahigayon ang ceremonial first toss, nga nagsimbolo sa opisyal nga pagsugod sa mga ballgames.

Gisundan kini alas-2:00 sa hapon sa Pickleball Competition, nga nahimong unang kompetisyon human sa ceremonial launching.

Ang maong sports activities gilaraw dili lamang aron makahatag og higayon sa mga kawani nga makigkompetensya, kondili aron mapalambo usab ang teamwork, disiplina, respeto, kahimsog, panaghigalaay ug camaraderie sulod sa LGU.

Nahimo usab kining higayon alang sa mga empleyado nga makagahin og panahon uban sa ilang mga kauban sa trabaho gawas sa naandan nga opisina, samtang nagpadayon sa pagpalig-on sa maayong relasyon ug espiritu sa pagtinabangay.

Base sa memorandum nga gipagawas sa Office of the Municipal Mayor, gitugutan ang mga department heads nga ipalahok ang ilang mga personnel sa maong kalihukan. Apan gipahinumduman usab sila nga magpadayon ang skeletal force sa ilang tagsa-tagsa ka opisina aron masiguro nga dili maapektuhan ang paghatag sa mga batakang serbisyo ngadto sa publiko.

Sa kinatibuk-an, ang 2026 LGU-Ipil PCSA Ballgames nahimong usa ka paagi sa pagsaulog sa Civil Service Anniversary pinaagi sa sports, samtang gipalig-on ang prinsipyo nga ang serbisyo publiko mas molig-on kung ang mga kawani nagtinabangay, nagrespeto ug nagkahiusa.

Kay sa matag kompetisyon, adunay modaog ug adunay mapildi. Apan labaw pa sa resulta sa scoreboard, ang labing bililhon nga kadaugan mao ang panaghiusa, sportsmanship, respeto ug padayon nga pagserbisyo alang sa katawhan.