LUNGSOD SA IPIL ANDAM NA SA PINAKAHAYAG NGA CHRISTMAS CARNIVAL

Thata Manlapaz

IPIL, ZAMBOANGA SIBUGAY — Andam na ang lungsod sa Ipil sa usa ka mas hayag, mas lingaw, ug mas makalingaw nga pagsaulog sa Pasko niining tuig 2025. Pinaagi sa Ipil Christmas Carnival, ubos sa pagdumala ni Ipil Mayor Ramses Troy “Rambo” C. Olegario, muabot na sa unang higayon ang pinakahayag nga pagsaulog sa pasko sa kasaysayan sa lungsod.

Ang Christmas Carnival mahimutang sa Ipil Multi-Purpose Government Center sa Taway, diin adunay mga suga, rides, colorful attractions, ug fireworks display. Gawas pa niini, aduna say lugar alang sa night market nga puno sa pagkaon, souvenirs, ug local nga mga produkto.

Ang opisyal nga Lights-On Ceremony alang sa Christmas Carnival ipahigayon karong Nobyembre 30, 2025 sa gabi-i sa Ipil Multi-Purpose Government Center, Taway, Ipil, Zamboanga Sibugay.

Matud pa sa mayor sa lungsod nga si Hon, Ramses Troy D. Olegario, unang higayon kining mahitabo dinhi sa lungsod sa Ipil ug dako ang iyang kalipay nga madala dinhi ang usa ka grand carnival aron nga masinati sa mga pamilyang Ipilenos ang kalingawan nga kanhing masinati lamang sa mga pamilyang mubyahe pa sa halayong. Gidugang pa sa mayor nga mulungtad ang maong carnival sa sulod sa usa ka bulan arun nga muhatag ug kalingawan sa mga lumulupyo sa lungsod sa Ipil ug sa mga silingang lungsod niini.

Butyag pa sa mayor, “Sa nakalabay’ng katuigan, kanunay nga nagdecorate ang lungsod sa Ipil ug mga Christmas lights diin dako-dako usab ang gasto sa lungsod, Ug tungod kay matag Disyembre aduna usa’y nindot nga lights sa kapitolyo, akong gihuna-huna nga unta makahatag ang lungsod ug lain usab nga kalingawan apan nakatutok alang sa tibook pamilya tungod kay mao man kini ang kahulugan sa pasko, ang panaghiusa. Gani, ang tema sa kasaulugan sa lungsod sa Ipil kay Pasko sa Ipil; Kahayag ug Gugma sa Matag Pamilya”.

Lakip sa kasadya ang Live Performance ni Don Petok ug sa Don Petok Band, kauban usab ang mga lokal nga banda sa grand opening night, carnival rides ug attractions alang sa tibuok pamilya.

Giawhag ang tanan nga Ipileños nga moduyog sa festive celebration ug mosaksi ug makighiusa sa pagsugod sa kahayag sa Pasko sa Ipil.