SANGGUNIANG BAYAN SA IPIL, NAGPAHIGAYON UG PUBLIC HEARING SA MGA BAG-ONG ORDINANSA BATOK SA MENDICANCY O PANGLIMOS, SUKOD SA PRESYO SA KRUDO UG UBAN PANG PALALITON, UG LAND USE PLAN

Thata Manlapaz

IPIL, ZAMBOANGA SIBUGAY- Nagpahigayon ug usa ka public hearing ang Sangguniang Bayan sa Lungsod sa Ipil, Zamboanga Sibugay aron hisgutan ug ipresentar ang pipila ka importante nga mga proposed ordinances nga makaapekto sa komunidad, ilabi na sa kahapsay sa lungsod, proteksyon sa konsyumer, ug husto nga paggamit sa yuta o luna.

Nagsugod ang programa pinaagi sa invocation ug gisundan sa pambansang awit. Gisundan gayud dayon kini sa welcome remarks ni SB Member Dianne L. Cataluña nga nagpasiugda sa kamahinungdanon sa maong kalihukan isip pamaagi sa pagpaminaw sa tingog sa katawhan. Gipresentar dayon ang overview sa mga ordinansa nga hisgutan sa maong public hearing, pinaagi ni Estelita S. Eguia, ang Secretary to the Sangguniang Bayan. Ang unang hilisgutan mao ang bahin sa mendicancy o panglimos nga gipangunahan ni SB Elias S. Dangpalan. Ang proposed ordinance nagtumong sa pagwagtang ug pagpugong sa panglimos sulod sa lungsod sa Ipil pinaagi sa paghatag ug angay nga programa ug serbisyo alang sa mga mendicants pinaagi sa tabang pinansiyal gikan sa Municipal Social Welfare Development (MSWD). Lakip usab niini ang pag-establisar ug Municipal Anti-Mendicancy Task Force aron mas epektibong matubag ang maong isyu. Human sa presentasyon, giablihan ang open forum aron madungog ang mga opinyon ug suhestiyon sa mga partisipante.

Sunod nga gihisgutan ang ordinansa kabahin sa fuel o petroleum products and other commodities nga gipresentar ni SB Alberto A. Alcoriza Jr.. Ang maong proposed ordinance nagtumong sa pagpanalipod sa mga konsyumer ug pagsiguro nga patas ug organisado ang pagbaligya sa mga negosyo, labi na sa panahon sa emerhensiya o krisis. Gipasiugda niini ang pagkamahinungdanon sa availability sa mga basic necessities ug prime commodities, lakip na ang petroleum products, sa makatarunganong presyo. Sama sa unang hisgutan, giablihan usab ang open forum alang sa diskusyon.

Ikatulong gipresentar ang CLUP o Comprehensive Land Use Plan ug Zoning Ordinance sa lungsod nga gipangunahan ni SB Iric M. Alibutdan. Kini nga plano nagtumong sa hapsay ug organisadong paggamit sa yuta sa Ipil aron masiguro ang balanse nga kalambuan sa komersyo, residensyal, ug uban pang sektor. Gihatagan usab ug higayon ang publiko nga makahatag sa ilahang mga komento ug suhestiyon pinaagi sa open forum.

Sa katapusan, gipahigayon ang closing remarks ni SB Alberto A. Alcoriza Jr., nga nagpasalamat sa tanang mitambong ug mipahayag sa padayon nga paningkamot sa konseho sa paghimo ug mga polisiya nga makabenepisyo sa katawhan.

Ang maong public hearing nagpakita sa pagkamahinungdanon sa partisipasyon sa publiko sa paghimo ug mga balaod aron masiguro nga ang mga ordinansa makatubag gayod sa tinuod nga panginahanglan sa komunidad.