HOUSE BILL 178, PASADO NA SA 2ND READING: REFUND ALANG SA INTERNET UG TELECOM OUTAGES, ALANG SA PATAS UG DIGNIDAD SA KATAWHAN

Thata Manlapaz

IPIL, ZAMBOANGA SIBUGAY- Opisyal nang napasar sa Ikaduhang Pagbasa (2nd Reading) sa ubos nga kapulungan sa Kongreso ang House Bill No. 178, nga nailhan isip “The Refund for Internet and Telecommunications Services Outages and Disruptions Act.” Tumong niini nga balaod ang pagpanalipod sa mga konsumante batok sa kanunay ug dugay nga internet ug telecom service interruptions pinaagi sa automatic nga refund o bill adjustment.

Sumala sa balaodnon, kung adunay outage o grabe nga disruption sa serbisyo sa internet o telecommunication, dili na kinahanglan mangayo pa ang subscriber aron ma-refund o ma-adjust ang ilahang bayranan. Obligado ang mga Public Telecommunications Entities (PTEs) ug Internet Service Providers (ISPs) nga mohatag dayon ug pro-rated refund o credit, base sa gidugayon ug epekto sa kapakyasan sa serbisyo, ubos sa klaro ug standard nga proseso nga bantayan sa angay nga regulatory agency.

Gipasiugda sa sugyot balaodnon nga apil ug patas ang tanang klase sa subscribers, postpaid ug prepaid kay kasagaran ang prepaid users maoy mas maapektuhan ug kanunay makalimtan sa refund mechanisms. Kung naapektuhan ang ilang serbisyo, parehas ra ang ilahang katungod sa refund o credit, bisan unsa pa ang pamaagi sa pagbayad.

Giingon sa explanatory note nga sa digital age, ang kasaligan nga internet ug telecom services importante kaayo sa edukasyon, negosyo, trabaho, ug adlaw-adlaw nga komunikasyon. Bisan pa niini, daghan gihapon ang nakaagi sa kalit ug walay pahibalo nga interruptions, nga nagresulta sa pinansyal nga pagkalugi, kalisod, ug dili patas nga pagpaningil. Pinaagi sa HB 178, gituyo sa estado nga lig-unon ang consumer protection, accountability sa service providers, ug digital fairness.

Ang kalampusan sa 2nd Reading gibuhat uban sa suporta sa ICT Committee, ubos sa pagdumala ni Chairman Miguel Luis “Migz” Villafuerte, uban ni Committee Secretary Ranier Alvarado, nga nagpakita sa kusog nga paningkamot sa Kamara aron mahatagan ug hustisya ang mga konsyumer sa digital services.

Ang House Bill 178 gipasiugda ni Congresswoman Marlesa “Doc Marly” Hofer-Hasim, Representative sa 2nd District of Zamboanga Sibugay. Para kaniya, dili lang kini bahin sa refund, kundili bahin sa dignidad ug patas nga pagtan-aw sa katawhan nga nagbayad ug insakto para sa serbisyong ilahang gisaligan. Human sa pagpasa sa Ikaduhang Pagbasa, ang balaodnon mosulod sa sunod nga mga lakang sa lehislatura. Gilauman sa kadaghanan nga kini mapasar sa katapusang pagbasa ug mahimog balaod, aron masiguro nga ang matag Pilipino adunay klaro, patas, ug kasaligan nga internet ug telecommunication services.