LUNGSOD SA IPIL NAPILI NGA RECIPIENT SA PHP50 MILYONES NGA PH COMMUNITY RESILIENCE PROJECT
IPIL, ZAMBOANGA SIBUGAY- Usa ka maayong balita para sa tanang Ipileños tungod kay opisyal nang napili ang lungsod sa Ipil isip benepisyaryo sa Philippine Community Resilience Program (PCRP). Ang maong programa gi-uyunan sa DSWD KALAHI-CIDSS National Program Management Office nga adunay tumong sa pagtukod ug lig-on, andam, ug responsableng mga komunidad, ilabi na sa pag-atubang sa kalamidad ug kalisdanan.
Sumala sa opisyal nga memorandum, ₱50 milyones ang gi-aprubahan nga pondo alang sa Ipil. Kini nagapasabot sa dako nga pagsalig sa nasudnong gobyerno sa kapasidad sa lokal nga panggamhanan sa Ipil. Nagapakita kini nga andam ang LGU, klaro ang direksyon sa kalambuan, ug lig-on ang sistema sa pagdumala sa mga proyekto.
ADVERTISEMENT
Malipayon usab nga gidawat sa LGU Ipil ang maong pondo uban ang klarong commitment sa counterpart funds. Nagapasabot kini nga andam ang lokal nga panggamhanan nga makigduyog sa responsibilidad aron mamahimong mas epektibo ug mas malungtaron ang mga proyekto.
Nagspakita kini nga ang tinuod nga kausaban masinati kung adunay panaghiusa tali sa gobyerno ug komunidad. Isip unang lakang sa pagpatuman sa programa, gipahigayon ang LGU Capacity Assessment nga gitambungan sa mga department heads sa munisipyo. Dinhi gisusi ang kahapsay, sa sistema sa LGU aron masiguro nga ang PCRP mapatuman sa insakto ug dayag nga pamaagi. Importante kini aron masiguro nga ang pondo magamit sa hustong proyekto ug adunay tin-aw nga resulta para sa katawhan.
Ang PCRP gilauman nga magdala ug dagkong kausaban sa mga kabarangayan sa Ipil, lakip na ang kalig-on sa pagdumala, kaandam sa kalamidad, kaugmaon, mas protektado nga panginabuhi sa mga pamilya, mas ingklusibo nga partisipasyon sa katawhan sa pagpatuman sa mga proyekto, ug mas mapadayunon nga kalidad sa serbisyo sa katilingban.
Nagapasalamat ang LGU Ipil sa DSWD KALAHI-CIDSS sa pagsalig ug padayon nga pagtabang sa lokal nga panggamhanan ug komunidad. Padayon ang panawagan sa panaghiusa ug kooperasyon, kay kung lig-on ang komunidad, lig-on usab ang kaugmaon sa Ipil.
