ZSBPPO PROVINCIAL DIRECTOR PERSONAL NGA NAGDUMALA SA MGA CHECKPOINTS SA LUNGSOD SA IPIL

Daphne Santuyo

IPIL, Zamboanga Sibugay -Personal nga gidumalahan ni PCOL Barnard Danie V. Dasugo, Provincial Director sa Zamboanga Sibugay Police Provincial Office (ZSBPPO), ang serye sa mga checkpoint operation nga gipahigayon sa nagkadaiyang bahin sa lungsod sa Ipil isip kabahin sa gipakusgan nga paningkamot sa kapulisan aron masiguro ang kalinaw, kahapsay, ug kaluwasan sa komunidad.

Ang maong operasyon gipahigayon sa kooperasyon sa Ipil Municipal Police Station (MPS) ug sa 2nd Provincial Mobile Force Company (PMFC) nga nagtumong sa pagpalig-on sa police visibility, pagpugong sa mga kriminal nga kalihokan, ug pagsiguro sa kahimtangan sa kaluwasan sa katawhan, ilabi na sa mga lugar nga giila nga sensitibo ug prone sa kriminalidad.

Matud pa sa ZSBPPO, ang personal nga presensya sa Provincial Director sa mga checkpoint usa ka tin-aw nga timailhan sa seryoso ug aktibong pagpangulo sa probinsyal nga kapulisan. Pinaagi niini, nasiguro ang hustong pagpatuman sa mga standard operating procedures, disiplina sa mga personnel, ug patas nga pagtrato sa tanang motorista ug molabay nga katawhan.

Gipasiugda usab sa maong operasyon ang preventive policing strategy sa PNP, diin tumong nga mapugngan ang krimen sa dili pa kini mahitabo pinaagi sa aktibong presensya sa kapulisan sa kadalanan ug komunidad. Ang maong lakang gilauman nga makapamenos sa mga insidente sa illegal nga kalihokan ug makapadugang sa pagbati sa kaluwasan sa publiko.

Ang checkpoint operations subay sa giya sa “Bagong PNP para sa Bagong Pilipinas: Serbisyong Mabilis, Tapat, at Nararamdaman,” nga nagpalig-on sa tumong sa PNP nga mahimong mas duol ug mas kasaligan nga kauban sa komunidad. Pinaagi sa maong programa, ginapangandoy sa kapulisan nga ang ilang serbisyo dili lamang makita, kundili mabati gyud sa katawhan.

Gibutyag sa ZSBPPO nga magpadayon ang maong mga operasyon sa nagkadaiyang lungsod sa probinsya aron mas mapalig-on ang public safety measures, mapreserbar ang kalinaw ug kahapsay, ug masiguro nga ang Zamboanga Sibugay magpabiling usa ka luwas ug linaw nga lugar nga puy-an ug panarbahoan.

Sa katapusan, gipahinumduman sa kapulisan ang katawhan nga magpadayon sa kooperasyon ug pagbantay, ug itaho dayon ang bisan unsang makadudang kalihokan ngadto sa pinakaduol nga police station, isip kabahin sa tinabangay nga paningkamot alang sa kalinaw ug kaluwasan sa tanan.