Opisyal sa Coast Guard Gipusil-Patay sa Ipil

Daphne Santuyo

IPIL, ZAMBOANGA SIBUGAY - Usa ka opisyal sa Philippine Coast Guard (PCG) ang gipusil-patay niadtong Miyerkules sa gabii, Enero 15, 2026, sa Purok Centro, Barangay Veterans Village, Ipil, sumala sa kapulisan.

Ang biktima giila nga si LTJG Glennick S. Ytang, 32 anyos, Commander sa Coast Guard Station Zamboanga Sibugay. Siya lumad sa Davao City ug kasamtangang na-assign sa probinsya sa dihang nahitabo ang insidente.

Matod pa sa taho sa kapulisan, nahitabo ang pagpamusil mga alas 8:00 ang takna sa gabii. Usa ka concerned citizen ang mitawag sa Ipil Municipal Police Station (MPS) alas 8:02 sa gabii aron itaho ang insidente. Diha-diha dayon miresponde ang mga kapulisan ug nakaabot sa lugar sa insidente alas 8:04 sa gabii.

Pag-abot sa mga pulis, ilang nadangpan si Ytang sulod sa iyang sakyanan nga usa ka puti nga Mitsubishi Strada, nga naglingkod sa driver’s seat. Siya adunay mga samad pinusilan sa ulo, wala nga kamot, ug dughan. Gideklarar siya nga patay na sa mismong lugar sa nahitaboan.

Ang suspek, nga wala pa mailhi, nakaikyas dayon human sa pamusil. Sumala pa sa awtoridad, ang gunman mipadulong sa direksyon sa RT Lim, Zamboanga Sibugay sakay sa usa ka Honda XRM nga motorsiklo.

Gi-secure sa mga awtoridad ang lugar ug nangayo og tabang sa Scene of the Crime Operatives (SOCO) alang sa pagproseso sa crime scene. Gidungan usab sa pulis ang pag-interbyu sa mga saksi ug pagsusi sa mga duol nga establisyemento alang sa CCTV footage nga makatabang sa pag-ila sa suspetsado.

Matud pa sa kapulisan, ang daghang samad tungod sa bala nagpakita nga tinuyo ug planado ang maong pag-atake. Bisan pa niini, wala pa masayri ang motibo sa pagpatay.

Padayon ang Ipil MPS sa ilang follow-up operations ug imbestigasyon aron mailhan ug madakpan ang suspek. Matod sa pulis, magpagawas sila og dugang impormasyon sa higayon nga adunay bag-ong detalye mahitungod sa maong insidente.