KIM CHIU NAGPASAKA UG PORMAL NGA KASO BATOK SA IYANG IGSUON NGA SI LAKAM

Thata Manlapaz

IPIL, ZAMBOANGA SIBUGAY- Pormal na ang lakang nga gihimo si Asia’s Multimedia Idol Kim Chiu human niyang gipasaka ang kaso batok sa iyang igsuon nga si Lakambini Chiu o naila nga Lakam niadtong Martes sa buntag, Disyembre 2, 2025.

Gibutyag kini sa Star Magic, ang talent agency ni Kim, pinaagi sa usa ka Instagram post diin gipakita ang mga hulagway sa aktres samtang nag-file sa maong kaso didto sa Justice Cecilia Muñoz Palma Hall sulod sa Department of Justice (DOJ) Building sa Quezon City.

Kauban ni Kim ang iyang mga abogado gikan sa LEAPLAW Lilagan Espinosa & Presto Legal and Technical Consultancy atol sa pagpasa sa mga dokumento. Sumala sa Star Magic, pormal na gayud nga gisumiter ni Kim ang kaso batok kang Lakambini.

Qualified theft ang kaso nga gipasaka sa maong aktres. Giisip kini sa Chinita Princess nga pinakasakit nga lakang nga iyang nahimo sa rason nga igsuon niini nga matuod ang iyahang gipasakaan sa kaso.

Matud pa nga tungod kini sa dakong kantidad nga nawala sa iyahang business operation ug nabalaka kini dili lamang alang sa iyahang kaugalingon apan lakip na sa kahimtang sa mga tawo nga kauban niini sa pagpadagan sa maong negosyo.

Si Kim Chiu karon aktibong makita sa telebisyon isip host sa “It’s Showtime” ug sa “Pinoy Big Brother: Celebrity Collab Edition 2.0.”