LGU-IPIL, NAGPAHIBALO SA OPISYAL NG TARIPA SA TRICYCLE; SOBRANG SINGIL, PAGA-AKSIYUNAN

Thata Manlapaz

IPIL, ZAMBOANGA SIBUGAY— Nagpagawas ug usa ka Public Advisory ang Lokal nga Panggamhanan sa Ipil pinaa sa opisyal nga account niini sa Facebook nga Atong Ipil, Atong Garbo, aron ipahibalo sa tanang pasahero ug mga drayber sa tricycle ug Bajaj Re ang opisyal ug dugay nang giaprubahan nga taripa kun plitehan sa tricycle sa munisipyo.

Sumala pa sa LGU Ipil, tungod sa nadawat nilang mga reklamo kabahin sa sobrang singil sa pasahe, ilahang gipahingusgan ang pag-monitor ug pagpatuman sa Municipal Ordinance No. 10-561-2020. Tumong niini nga masiguro nga patas, adunay hustisya, ug hapsay ang serbisyo sa tanang pasahero sa komunidad.

Gibutyag pa sa munisipyo nga ang pasahe sa tricycle magdepende sa kalay-on o kilometro sa biyahe. Ang giaprubahan nga plete mao ang ₱15.00 sa unang kilometro matag pasahero, ug ₱5.00 sa matag musunod nga kilometro. Sa bagahe, ang 25 kilos adunay charge nga half fare, samtang ang 50 kilos sama sa usa ka pasahero.

Samtang aduna usab 20% discount ang mga Senior Citizens, Persons with Disabilities (PWDs), ug mga Estudyante nga adunay balidong ID, samtang libre ang pasahe sa mga bata nga pito ka tuig paubos ang pangidaron.

Pinaagi sa maong anunsiyo, gipahinumduman usab ang mga drayber nga adunay mga multa ug silot ang dili mutuman sa fare rate. Sa unang paglapas, adunay ₱1,000 nga multa; sa ikaduhang paglapas, ₱1,500 nga multa; ug sa ikatulong paglapas, ₱2,500 nga multa, lakip ang pagdumili sa renewal sa prangkisa ug pag-impound sa tricycle.

Gidasig sa LGU ang tanang pasahero nga mureklamo kung makasinati ug sobrang singil. Ang mga pasahero gidasig nga mukuha ug klaro nga litrato sa Franchise Permit o Plate Number sa tricycle ug magsumite ug pormal nga reklamo sa Business Permit and Licensing Office (BPLO).

Sa katapusan, nagpasalamat ang LGU Ipil sa kooperasyon sa publiko ug naglaum nga pinaagi sa maayong panagsabot tali sa pasahero ug drayber, magpabiling hapsay ug patas ang serbisyo sa tricycle sa tibuok munisipyo.