DOLE-ZSP MAGLUNSAD UG DAKONG JOB FAIR ATOL SA IKA-92 KA TUIG NGA ANIBERSARYO

Thata Manlapaz

IPIL, ZAMBOANGA SIBUGAY- Sa pagsaulog sa ika-92 ka tuig nga malahutayong pag-alagad sa publiko, maglunsad ang Department of Labor and Employment (DOLE)-Zamboanga Sibugay ug usa ka dakong Job Fair nga ipahigayon karong umaabot.Disyembre 4, 2025, gikan sa alas- 9 ang takna sa buntag hangtud alas-5 sa hapon sa Gaisano Grand Mall, Ipil, Zamboanga Sibugay.

Ang maong kalihukan nagtinguha sa pag-abli sa tinuod nga oportunidad sa trabaho alang sa mga indibidwal ug pamilya sa tibuok probinsiya. Gibutyag sa DOLE-ZSP nga adunay 1,329 ka job vacancies nga giandam sa 14 ka employers, nga naglakip sa lokal nga mga trabaho ug mga kompaniya sa gawas sa nasud. Kini nagpasabot nga adunay daghang trabaho ang nagapaabot sa mga jobseekers, gikan sa entry-level nga posisyon, skilled jobs, hangtod sa propesyonal nga trabaho.

Tumong niini nga matabangan ang katawhan nga makabaton sa tarong ug insakto nga panginabuhian. Kini usab usa ka higayon nga makig-atubang ang mga aplikante kun makig face-to-face sa mga hiring companies, magpasa sa ilang dokumento, ug mapresentar ang ilang kwalipikasyon. Gihulma kini aron maminusan ang kalangay sa pagpang-apply ug mapadali ang proseso sa pagpangita ug trabaho.

Niini, giawhag sa DOLE-ZSP ang katawhan sa pagsalmot ug sa pagpahibalo niining oportunidad ngadto sa ilang mga higala, pamilya, ug komunidad. Usa kini ka pamaagi sa pagtinabangay aron mas daghan ang makakab-ot sa desenteng trabaho, ilabi na alang sa nagkinahanglan ug bag-ong direksiyon sa ilang karera.

Alang sa mas paspas nga proseso sa pag-apil, girekomendar ang pre-registration pinaagi sa link:bit.ly/92ND-DOLE-JF. Ang DOLE Zamboanga Sibugay gipangulohan ni Elamsalih Ungad uban ang kanunay’ng suporta gikan sa Panggamhanang Probinsiyal ubos sa liderato ni Governor Ann K. Hofer. Matud pa niini nga ang maong Job Fair simbolo sa mapadayonon nga paningkamot sa DOLE-ZSP sa paghatag ug tinud-anay nga serbisyo ngadto sa mga katawhan sa Zamboanga Sibugay.