Sashing Ceremony sa Bb. Sibugay, Mr. Sibugay ug Queen of Sibugay 2026 Ipahigayon Isip Pagsugod sa Pageant Season

Thata Manlapaz

IPIL, Zamboanga Sibugay - Opisyal nang pagasugdan ang panaw padulong sa koronasyon sa mga kandidata ug kandidato sa Binibining Sibugay 2026, Mister Zamboanga Sibugay 2026, ug Queen of Sibugay 2026 pinaagi sa Sashing Ceremony nga ipahigayon karong Pebrero 15, 2026, alas 9:00 sa buntag, sa Conference Room sa Zamboanga Sibugay Provincial Capitol Building, 4th Floor.

Atol sa maong mamahimong kalihukan, matag opisyal nga kandidata ug kandidato pagasuutan ug sash nga magsilbing simbolo sa ilahang pormal nga pagsalmot sa kompetisyon. Ang seremonya nagarepresentar sa ilahang commitment, disiplina, ug responsibilidad isip mga ambasador sa katahum, kultura, ug identidad sa probinsiya sa Zamboanga Sibugay.

Ang kalihukan gipanguluhan sa Office of the Provincial Tourism Office ubos sa buhatan sa gobernador sa lalawigan sa Zamboanga Sibugay, isip kabahin sa padayon nga paningkamot sa pagpalambo sa turismo, kultura, ug lokal nga talento. Gipasiugda sa buhatan sa Turismo ang mga beauty pageant isip usa ka epektibong pamaagi sa pagpakita sa kaanyag sa mga Sibugaynon, dili lamang sa panagway, kondili usab sa kaalam, kultura, ug kasingkasing sa serbisyo.

Ipahigayon ang maong seremonya ubos sa makanunayon nga suporta sa kasamtangang administrasyon ni Governor Ann K. Hofer, ngadto sa mga kalihukan nga nagapalig-on sa turismo ug nagahatag ug oportunidad sa kabatan-onan sa probinsiya. Human sa Sashing Ceremony, gilauman nga ang mga kandidata ug kandidato moagi sa nagkadaiyang kalihukan, trainings, ug outreach programs isip kabahin sa ilahang panaw padulong sa grand coronation night.

Ang kalihukan nagtimaan sa lig-on ug hugot nga sinugdanan sa usa na usab ka makapahinganghang pageant season sa Zamboanga Sibugay.